Inatsit tunngaviusoq

Ineqarnermut tapiissutit inoqutigiinnut inissiani attartukkani attartortitsinermilu inatsit atuutsinneqartoq malillugu pineqartuni najugalinnut tunniunneqartarput. Ineqarnermut tapiissut ineqarnermut akiliut, inoqutigiit ataatsimut isertitaat kiisalu meeqqat 18-it inorlugit ukiullit angajoqqaaminni najugaqartut amerlassusaat malillugit kisinneqartarpoq.

 

Inissiani attartortittakkani ineqarnermut tapiissutit pillugit Inatsisartut inatsisaat nr. 23 7. december 2015-imeersoq malillugu ineqarnermut tapiissuteqartoqartarpoq. Inatsit januaarip aallaqqaataani 2016-imi atuutsinneqalerpoq.

 

Inatsit tunngaviusoq, aningaasat annertussusaat aamma isertitaqqortussuseq naapertorlugu pisartakkat pillugit paasisaqarnerorusuttunut https://www.sullissivik.gl innersuussutigineqarpoq.

 

Naalakkersuisut nittartagaanni www.naalakkersuisut.gl-mi Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfiup ataani isumaginninnermut inatsisit, peqqussutit, nalunaarutit allallu takuneqarsinnaapput pissarsiarineqarsinnaallutillu (download).

 

 

Nalunaarsuutit tunngaviusut suliarinerilu

Kisitsisitigut paasissutissat 2021 ilanngullugu kommuneqarfinnit ineqarnermut tapisianit immikkut pissarsiarineqarput. 2022 aallarnerfigalugu paasissutissat pisortaqarfiit ataatsimoorussamik aningaasaqarnermut aaqqissuusaannit paasissutissat atorneqalerput.

 

Kisitsisitigut paasissutissat aaqqissuunneri

Nalunaarsuutit tunngaviusut allaffissorluni nalunaarsuiffinninngaanneerput, kisitsisitigullu paasissutissiinermut atortussiatut ineriartortitaanatik, taamaattumillu nalunaarsuutit tunngaviusut suliareqqillugit misissorlugillu suliaapput.

 

Nalunaarsuutinik misissuineq

Kisitsisitigut paasissutissanut kommunini ineqarnermut tapiissutinut nalunaarsuutit imaluunniit pisortat ataatsimoortumik aningaasaqarnikkut aaqqissuussaanut ineqarnermut tapiissutit nuunneqarsimasut atorlugit tunngavigineqarput. Ineqarnermut tapiissutini nalunaarsuutit avataasigut tapiliussat aamma isertitaqqortussuseq naapertorlugu nalilersuinerit kisitsisitigut paasissutissanut ilanngunneqanngillat.

 

Ineqarnermut tapiissutit tunniunneqarsimasut taamaallaat decembarimut attuumassusilerneqarsinnaasut ilanngunneqarput.

 

 

Periaaseq

Januaarip aallaqqaataat 2009 aallarnerfigalugu kommunit 18-iusimasut kommunerujussuarnut sisamanut katiterneqarput, 2018-imilu januaarip aallaqqaataani Qaasuitsup Kommunia aamma Kommune Qeqertalimmut kiisalu Avannaata Kommunianut avinneqarluni. Kommuniusimasut kommunini nutaani najugaqarfittut (distrikt) taallugit atorneqarput. Immikkoortiterinerit marluk ataani takussutissiami takuneqarsinnaapput.

 

Takussutissiaq 4. Kommunit najugaqarfiillu

Kommuni	Kujalleq	Sermersooq	Qeqqata	Qeqertalik	Avannaata
Najugaqarfik	Nanortalik	Ivittuut	Maniitsoq	Kangaatsiaq	Ilulissat
	Qaqortoq	Paamiut	Sisimiut	Aasiaat	Uummannaq
	Narsaq	Nuuk		Qasigiannguit	Upernavik
		Tasiilaq		Qeqertarsuaq	Qaanaaq
		Ittoqqortoormiit

 

 

Inuit amerlassusaannik killiliineq

Kisitsisini paasissutissani pineqartut tassaapput Naatsorsueqqissaartarfiup inunnik nalunaarsuiffiani inuit ukiup naanerani Kalaallit Nunaanni kommunini najugaqartutut allattorsimasut. Inuit nalunaarsuiffianni sumiiffimmi najugaqartutut allaqqasoq tassani najugaqartutut naatsorsuussaavoq, inuillu allattorsimaffianni sumiiffimmi najugaqartutut naatsorsorneqarsimaneq kommunit naatsorsuuserisarfianni allami najugaqartutut allaqqasinnaalluni.

 

Najugaqartut amerlassusaat

Naatsorsueqqissaartarfiup inoqutigiinnut nalunaarsuiffiani inoqutigiit aamma inoqutigiinneq meeqqat amerlassusaat nalunaarsorneqarsimasut naatsorsuutini atorneqarput. Inoqutigiinni najugaqartut amerlassusaat kommuninit ineqarnermut tapissuutinut naatsorsuutaanniittunit allaanerusinnaapput.

 

Naatsorsueriaaseq

Kisitsisitigut paasissutissanik saqqummersitami uani inuit ineqarnermut tapiissutinik pisartut amerlassusaat naatsorsorneqarput. Nuuttaarneq ilaatigut pissutaalluni, inoqutigiit qulit ukiut tamaasa decembarimi ataatsimit amerlanerusunik ineqarnermut tapiissutinik pisarput.